喺晚清，曾經有一位滿清貴族訪港，考察香港嘅海軍水平，佢就係末代皇帝溥儀嘅叔叔載洵。除咗呢個身份，佢仲係辛亥革命之前最後一位訪港滿清貴族。响1909年9月，載洵乘搭大清當時嘅主力艦「海圻號」抵達維多利亞港。據《南清早報》記載，抵港嘅除咗承載同護送載洵嘅兩艘軍艦，仲有一隻改裝過嘅、載住250個官兵嘅訓練艦同魚雷艇，場面壯觀，而中環海旁同附近碼頭亦擠滿圍觀者。

講返啲親戚關係先，話說溥儀登基嗰陣年紀太細，於是由父親載灃出任攝政王，輔助佢處理政事。載灃上任之後，隨即委派細佬載濤同載洵分別掌管陸軍同水軍大權。1909年，「籌辦海軍事務處」成立，而載洵喺擔任籌辦海軍大臣之後，好積極咁推動海軍現代化，除咗整頓水師舊有艦艇之外，仲創辦海軍大學，添置多艘新型艦艇，結束晚清以嚟各個地方海軍各自為政嘅局面。

同年8月，載洵由北京南下，去咗天津大沽、煙台、上海、象山、福州、杭州等地考察海軍力量。喺去廣州途中，載洵一行人途徑並短時間逗留香港。載洵一行甫一登岸，港府就鳴放21響禮炮，以示歡迎。

圖為載洵、「海圻號」照片，原圖嚟自香港歷史博物館。